Festîvala Dubaî ya Sînemayê filmê kurdî DOL qedexe kir

KurdishCinema.com / Avrél 13, 2007

Festîvala Dubai ya Sînemayê li Îmarat
Erebî piştî ku nîşandana filmê DOL ê
derhênerê kurd Hiner Saleem erê kiribû,
biryara xwe bi paş ve kişand û diyar kir ku
ew DOL nîşan nadin.

Dol gerek bû di Festîvala Dubai ya
Sînemayê de ku wê li jêr duruşma „Pira
kulturan“ lidar keve, bihata pêşkêş kirin.
Desteya birêvebir a festîvalê di nameyekê de bo şirketa mîtosfilm a belavkira DOL,
diyar kir ku mijara film ji hêla siyasî ve bo wan pir giran hatiye û ew bo vê yekê jî
derfetê nadin film ku di çarçewa festîvala wan de bê pêşkêşkirin.

Tiştekî hem seyr û hem jî balkêş e ku festîvalên Dubayê yên sînemayê ta nuha rê li
ber pêşkêşkirina 2 filmên kurdî girtine. Berî nuha jî filmê „Davîdê Tolhildan“ ê
derhênerê kurd Mano Xelîl jî piştî erêkirinê ji festîvala Dubai hate dûrxistin, piştî ku
balyozxaneya Tirkiyê gilî li cem desthilatdarên dewleta Îmarata Erebî kiribûn.

Hêjayî gotinê ye ku DOL ji 26.04.2007 de li seranserî Elmanyayê di sînemayan de
tê pêşkêşkirin.

Li gor agahdariyên şîrketa mîtosfilm a elmanî ku hem Co-Produktion û hem jî
belavkira Dol e li Elmanyayê, gelek festîvalên navnetewî yên sînemayê Dol
vexwendine ku di çarçeweya wan de bê nîşandan mîna: festîvala filman a Tribeca li
USA, festîvala Aşad a navnetewî ya sînema û muzîkê - Israîl, festîvala navnetewî ya
filman li Innsbruch –Austuriya, festîvala Karlovy Vary ya filman li komara Çîk,
festîvala Bangkok a filman, festîvala navnetewî ya sînemayê – Monterrey (Meksîko),
festîvala Montreal a filman – Kanada, 23. festîvala Heyfa ya filman – Israîl, festîvala
filman a mafê mirovan li Nürnberg – Elmanya, festîvala London a filman, festîvala
filman a mafê mirovan li Sîol – Korya Başûr, festîvala Pesaro Nuovo ya sînemayê –
Îtalya, festîvala Tortheim a filman – Norwêcê.

DOL filmeke derbarê perçekirina
Kurdistanê û çewisandina nasnameya
kurdî ye û ew herî bêtir bingeha
nijadperest a sîstema kemalîsmê û
tundiya Tirkiyeyê li hemberî kurdan
rexne dike. Ev rexnegirtin her ji dîmena
destpêkê ve ji temaşevanan re diyar
dibe.

Di Dol de gelek lîstikvan û
hunermendên kurd ên naskirî rol
girtine, mîna: Nazmî KIRIK, Belcim
BILGIN, Sipel Dogu Lesar ERDOGAN,
Omer CIAW SIN, Rojîn ULKER, Tarik
AKREYÎ, Ciwan HACO û Abdullah
KESKÎN.

çavkani: netkurd.com